Sjálfstæðismenn og konur eiga samúð mína alla

Hugsið ykkur hvað Sjálfstæðisflokkurinn hefur þurft að ganga í gegnum á síðustu vikum og mánuðum. Öll hugmyndafræði flokksins hefur reynst gagnlaus og hreinlega hættuleg.

Allt það sem þeir hafa verið að hæla sér var innistæðulaus blekking sem þeir þó sjálfir héldu og halda jafnvel enn að hafi verið sannleikur.

Allur ávinningurinn af stjórnkænsku þeirra gufaði upp á viku og var í raun aldrei annað en bóla full af greftri.

Allt tal um að flokkurinn þeirra væri sá eini sem hefði vit á fjármálum hefur ekki aðeins reynst rangt heldur hrein og klár öfugmæli.

Fullyrðingar um hina sterku og hæfileikaríku ráðherra og forystumenn eru bara einhver grátlegur misskilningur byggður á blindri sjálfsdýrkun sem engin stoð var fyrir í raunveruleikanum.

Allir landsfundirnir þar sem þúsund manns borguðu sig inn til að geta dáðst af formönnum sínum og til að upplifa sig í þeim hluta þjóðarinnar sem vissi og gat, deildi og drottnaði. Allt þetta hefur reynst vera leikhús fáránleikans.

Og nú hafa þau misst völdin og vita innst inni að þau líka að það var það sem þau áttu skilið.  

Ef ég væri Sjálfstæðismaður þá væri ég líka i fýlu og afneitun, það er bara mannlegt.

Athugasemdir

[Árni Gunnarsson, 28.1.2009 kl. 23:23]

Fyrtsu viðbrögð frjálshyggjumanna við bankahruninu í USA voru þau að það hefði ekki verið frjálshyggjustefnan sem brast og setti dominoáhrifin í gang,nei- það var andskotans sósíalismanum að kenna. Og með því að ríkisvæða bankann sem var í andarslitrunum tókst þessari banvænu hugmyndafræði að setja fótinn fyrir uppgang heimsbyggðarinnar. Ég heyrði ávæning af sömu kenningu hér í "plássinu" fyrstu dagana eftir hrunið.

[Halldór Sverrisson, 31.1.2009 kl. 10:51]

Heittrúaðir frjálshyggjumenn hafa hægt um sig þessa dagana, en ég held ekki að þeir hafi gengið af trúnni. Flestir eru þeir þess fullvissir að þeirra tími muni koma aftur. Mig minnir að Hannes Hólmsteinn hafi orðað þetta á þá leið að hrunið nú sé ekki kapítalismanum (auðhyggjunni) að kenna heldur vondum auðmönnum. Mér skilst þó að þeir séu fáir í heiminum, en því miður eru íslenskir auðmenn margir hverjir í þessum hópi að mati Hannesar, Davíðs og samherja þeirra. Verst að ekki skuli vera hægt að kenna þeim um heimskreppuna.

Hinir heittrúuðu hafa þó skýringu á orsökum heimskreppunnar. Amerískir bankastarfsmenn urðu gegnsýrðir af þeirri sósíalísku villutrú að óhætt væri að lána fátæklingum og aumingjum peninga fyrir húsnæði, því ef það væri gert í nógu stórum stíl mundi ríkið koma til bjargar ef illa færi með afborganir af þessum lánum. Þegar það dróst að ríkið gripi inn, var gripið til þess ráðs að fela óreiðubréfin í vafningunum frægu, sem síðan voru seldir auðtrúa bankamönnum um allan heim. Sem sagt; sósíalisminn er lævís og lipur og á það til að læðast inn í hugarheim hörðustu kapítalista með hörmulegum afleiðingum fyrir heim allan.